COVID-19 Nesenel Pandemik Kontrola David Manning i askim pablik na ol helt woka long no ken givim sans long COVID-19.

Em i tok, namba bilong COVID-19 keis long Papua Niugini i nau stap long 599 na long wankain taim namba bilong COVID-19 keis long wol i go moa long 50 milien.

“Mi laik toksave gen long pablik olsem COVID-19 em i stap yet olsem birua long ol pipel bilong yumi olsem na yumi mas kisim was na stap longwe long arapela, putim pes mask taim yumi stap namel long ol pablik ples na wasim han olgeta taim.

“Yumi yet i mas lukautim helt bilong yumi yet,” Mista Manning i tok.

Hela Provins i bin ripotim namba wan keis bilong COVID-19 long provins long las wik olsem na Nesenel Kontrol Senta (NCC) bilong COVID-19 i salim wanpela tim i go long Hela Provins long sapotim wok bilong helt tim bilong Hela Provins long mekim ol wokpainimaut bilong ol keis, kontek tresing na kisim ol testing sempol.

Nesenel Pandemik Kontrola Manning i toksave gen long ol helt fesiliti na ol haus sik long i go het na sekim ol manmeri na pikinini husat i go insait long banis bilong ol long banisim ol helt woka na ol sikmanmeri na piknini long COVID-19.

“Mipela i luksave olsem sampela ol helt fesiliti i stopim pasin bilong sekim ol manmeri na pikinini we dispela i ken putim laip bilong ol sikmanmeri na pikinini na ol wokmanmeri bilong helt long mak nogut. Mi laik strongim ol helt woka na ol lain i wok long franlain long tingim na holim strong ol lo bilong COVID-19,” Mista Manning i tok.

Em i singaut long ol sios long mekim planti awenes long Nupela Pasin bikos em i tok klinpela pasin em i pasin bilong God na ol lo bilong COVID-19 i save apim pasin bilong stap klin.

Rebecca Negere i raitim