MADANG Ats Maniaks (MAM) Skul long Madang provins i surukim trening program bilong ol i go long Februeri 2021.

Dispela skul skul i save trenim ol yangpela long droim ol piksa na penim ol grafik disain long soim stap na laip bilong tude.

Dairekta bilong MAM na biknem atis bilong Madang, Robert Banasi i tok ol i surukim trening program bikos long hevi bilong coronavirus (COVID-19).

Mista Banasi i tok MAM em wanpela ogenaisesin long Madang husat i gat ol speselis tisa long skulim ol pikinini long wok bilong ats.

Moa yet, em i tok ol i save givim skul tu long sait bilong musik.

Em i tok laik namel long ol yangpela manmeri long Madang na tu ol papamama long salim ol pikinini i go long kisim trening wantaim MAM i bikpela.

MAM i bin go pas long kamapim planti gutpela awenes long ol grafik disain bilong em we ol i putim long ol kona na strit na ol setelmen long Madang taun long tokaut long COVID-19 na hevi em inap kamapim.

Banasi i tok ol MAM atis i bilong Madang na ol i laik skulim ol pikinini bilong Madang long holim strong na surikim kalsa bilong Madang i go moa yet long bihain taim.

Ol i laik strongim tu “Kagin bilong Madang’ o pasin bilong Madang long i no ken lus.

Mista Banasi i tok Madang pastaim i gat ol gutpela atis olsem Taba Silau na Larry Santana.

James G. Kila i raitim