NAMBA wan skul bilong ol meri tasol long Simbu Provins i holim namba wan greduesen bilong en las wik Fonde long Dirima, Gumine Distrik.

Long dispela greduesen Mary Immaculate Girls Technical Secondary School (MIGTSS) i lukim 39 gret 12 sumatin i kisim setifiket. Long dispel taim tu 23 sumatin i kisim gret 10 setifiket bilong ol. Dispela ol 23 sumatin i bin pinis long dispela skul taim em i stap olsem vokesenel skul na statim teknikel hai skul stadi taim skul i senis i go long teknikel sekenderi skul.

Minista bilong Haia Edukesen Risets Saiens na Teknoloji na Memba bilong Gumine Nick Kuman i bin stap long dispel greduesen.

Ol arapela husat i bin stap e mol i makim sios, komyuniti, edukesen na ol arapela gavman dipatmen na NGO.

Long soim amamas bilong em Mista Kuman i givim K250,000 bilong wokim wanpela nupela klasrum bilding.

MIGTSS Prinsipel Sista Regina Anthony bilong ol Salesian Sisters i tok dispela skul e mi narakain long wanem e mi wanpela skul tasol bilong ol meri long Simbu Provins we tisim ol akedemik na teknikel sabjek.

Em i tok ol teknikel sabjek em Nesenel Setifiket 1 na 2 long Opis Edministresen na gamen teknoloji.

Long ol gret 12 sumatin Wenambo Regina i bin kisim daks long Saiens na Chan Elis i kisimdaks long Humanity. Tupela i kamap namba tu em Zena Sipu long Saiens na Dima Sandy na Samuel Turner long Humanity.

Pilga Ann-Mala i kisim daks bilong gret 10 na Bomai Malia wantaim Bilge Rosulla i bin kamap namba tu.

Ol sumatin i kam long olgeta hap long Simbu Provins na sampela i kam long ol arapela provins tu.

Dirima nau i hostim wanpela praimeri skul, wanpela teknikel sekenderi skul bilong ol yangpela meri na Simbu Nesenel Polyteknik Institusen (SNPI). SNPI bai i stat kisim ol sumatin long 2022.

Ennio Kuble i raitim