PLANTI tisa long planti skul insait long PNG i save pilim hevi long taim i no gat haus na gutpela ples bilong slip na go tisim ol sumatin.

Long las mun Lealea Praimeri Skul i bin amamas taim skul i opim wanpela nupela haus tisa. Wantaim helpim bilong ExxonMobil PNG nau wanpela tisa i ken kisim bel isi, stap isi long haus na go tisim ol sumatin.

Deputi Het Tisa Joseph Kolowa i tok skul i amamas tru long kisim nupela haus na i tok tenkyu long ExxonMobil PNG.

Mista Kolowa i tok em i gutpela tu wanpela tisa meri Wapu Tinai, i go insait long dispela haus.

“Taim haus i stap klostu Mis Tinai i no ken ran i go longwe long givim susu long bebi bilong em na kam bek long skul,” em i tok.

Laba Holdings wanpela kampani bilong ol papagraun i bildim dispela haus long mani mak bilong K90,000.

Lealea Praimeri skul em i wanpela level 5 skul na i gat moa long 500 sumatin. Planti tisa bilong en i no gat haus yet o i stap longwe na i save kam long skul.

Long dispela taim tu Mista Kolowa i tokaut long hevi bilong no gat wara long dispela skul.

I no long taim i go pinis ExxonMobil PNG i givim tu wanpela narapela haus bilong het tisa. Ol arapela samting ExxonMobil i mekim em wanpela nupela toilet na liklik wara tenk bilong wasim han bihainim protocol bilong banisim COVID-19.

Rosa Koian i raitim