TRIPELA-de rifresea kos bilong ol elementeri tisa insait long Lae distrik i kamap long Martin Luther Seminary long26 - 28 Oktoba, 2020.

Dispela kos em ol i kolim, "Parenting For Child Development [P4CD]" o long Tok Pisin em Skul bilong lukautim kamap bilong pikinini.

Dispela kos i sut long ol gutpela rot bilong skulim pikinini taim em gro.

Francis Ururu husat i stap long Simbu Provins i bin go pas long dispela kos.

I gat save olsem planti ol papamama long dispela taim i no save skulim na lainim ol pikinini long gutpela rot bilong stap.

Em i tok pikinini i save lain gut taim krismas bilong em i stap namel long tripela yia i go long 10.

Em i tok bihain long dispela em i save hat liklik long pikinini i harim tok bilong papamama o gadian long ol skul toktok.

Ururu i tok dispela long wanem pikinini long dispela taim bai stat long lusim papamama na bai poroman wantaim ol wankrismas bilong em na planti taim em bai stap longwe long papamama.

Em i tok moa olsem pikinini bai lain tu long ol nupela samting ol wankrismas bilong em i mekim.

Kain ol salens bai mekim papamama i gat hevi na kros long pikinini.

Sampela taim bodi bilong pikinini bai senis tu na dispela ol senis long bodi inap mekim pikinini i no harim tok hariap.

“Sapos papamama i salim pikinini long pulapim wara o kisim paiawud na pikinini i no laik orait, papamama i no ken kros hariap,” Ururu i tok.

“Nogut pikinini i hangre, i gat sik o i no amamas long sampela samting na i no bekim hariap.

“Papamama i mas helpim pikinini long dispela taim.”

Ururu i tok taim papamama i helpim pikinini, pikinini bai amamas na harim tok gut.

Dispela program em pastaim Katolik sios i save go pas long long Simbu, Madang na Mt. Hagen tasol nau Ivanjelikal Luteran Sios (ELC) i kisim i go insait long Morobe wantaim helpim bilong UNICEF.

Em tok bilong program em: "Parenting For Child Development o Pasin bilong kamapim gut pikinini.”

Sanang Zazoring i raitim