MOA long 1 milien pikinini long Papua Niugini aninit long 5-pela krismas bai kisim banis sut long dispela mun Novemba long banisim ol yet long sik polio.

Nesenel Dipatmen bilong Helt na HIV/AIDS i bin opim kempen bilong banis sut bilong polio long Sarere na ol Provinsal Helt Atoriti (PHA) i karim aut wokmak bilong banisim ol pikinini aninit long 5-pela krismas long dispela wik Mande. Dispela banis sut kempen bilong polio bai pinis long Novemba 16, 2020.

Minista bilong Helt na HIV/AIDS Sir Dokta Puka Temu i singaut long ol Provinsal Helt Atoriti long kisim was long COVID-19 taim ol i karim aut dispela kempen.

“Mi laik singaut long olgeta provins long apim mak bilong redi, kisim was na long rispon long luksave, menesim na kea long ol nupela keis bilong COVID-19 namel long dispela kempen.

“COVID-19 i bringim planti hevi long helt sistem bilong mipela na tu i bagarapim taim bilong mipela long givim banis sut. Dispela kempen bilong banis sut bilong polio mas i kamap bikpela inap long olgeta pikinini i kisim banis sut na i no gat wanpela i stap nating,” em i tok.

“Mipela i no inap long i go insait gen long narapela autbrek bilong sik olsem mipela i bin bungim long 2018 na 2019 taim polio i bin kamap long PNG. Mipela i bin pinisim gut dispela autbrek na mipela i mas holim strong dispela nem olsem polio-fri kantri,” Dokta Temu i tok.

Em i tok tu olsem maski COVID-19 i stap ol arapela helt program i mas i go het yet olsem ol sevis bilong givim banis sut.

Rebecca Negere i raitim