Papua Niugini i opim wanpela sistem long intanet we ol lain i kam long ovasis bai pulmapim wanpela fom ol i kolim ilektronik helt dekleresen fom (eHDF) na givim i go long Nesenel Rispons Pandemik Kontrola David Manning na tim bilong en 24 aua bipo long ol i kam insait long kantri.

Dispela fom em narapela rot bilong daunim mak bilong COVID-19 long kam insait long kantri.

Olgeta manmeri husat i trevol ovasis, maski ol manmeri long PNG, olgeta yet i mas pulmapim eHDF na salim i kam long dispela link: https:www.pnghdf.info

“Taim yumi isi isi long opim boda bilong kantri na larim ol PNG manmeri na ol bisnis manmeri i go i kam, yumi mas kisim was tu na strongim helt bilong ol pipel na ol visita bilong yumi. Yumi no inap long lustingting long helt bilong yumi long ol ples bilong kam insait long kantri, nogat. Olsem na ol manmeri husat i laik raun i mas bihainim dispela lo,” Kontrola Manning i tok.

Ol i traim pinis dispela eHDF long las mun na ol i lukim olsem em i isi tru long yusim na ol i ken monitarim ol infomesen we ol trevola i givim long en.

“Mi laik tokim ol manmeri na pikinini husat bai raun long givim ol stretpela infomesen tasol taim ol i pulmapim dispela fom na husat i giaman bai PNG Pandemik Ekt 2020 lo bai mekimsave long ol,” Mista Manning i tok.

Ol Sevelens na Epidemioloji Yunit bilong Nesenel Kontrol Senta i kamapim dispela na ol ples bilong kam insait long kantri na ples bilong kwarentin i karimaut ol dispela wantaim sapot bilong Nesenel Dipatmen bilong Helt na World Health Organization.