DIRIMA Komyuniti Helt Pos insait long Gumine Distrik, Simbu Provins i gat nupela haus karim bilong ol mama.

Dispela nupela haus karim i kamap long mani ol famili na pren bilong St Anna Peris pris Pater Pita Kim long Saut Korea. Ol voluntia bilong Dirima i wokim dispela haus stat long namel bilong dispela yia.

“Mi stap long Dirima olsem foapela yia. Mi pater na wok bilong mi long lukautim sol bilong ol manmeri tasol i gat nid long lukautim manmeri long bodi tu i stap yet. Olsem na mi bin askim ol famili na ol pren bilong mi long helpim long mekim wanpela wod bilong ol mama husat laik karim bebi. Na ol givim mani long wokim dispela haus nau i sanap pinis,” Pater Kim i tok.

Pater Kim, em wanpela SVD pris. Em i tok Dirima–Yani komyuniti i gat 5-pela wod kaunsil long Gumine lokal level gavman we ol mama i laik karim bebi i save painim hat long go long haus sik long karim.

Em i tok Gumine sab-helt senta i stap tupela kilomita long Dirima na Kundiawa Provinsel Haus Sik i stap 33 kilomita long Gumine. Ol mama i painim hat long kisim kar i go long wanem sampela taim ol i no gat mani.

Na tu i no gat ol meri i kisim trening pinis long helpim ol bel mama long karim bebi long ol hauslain.

“Olsem na taim mi askim, ol famili na pren bilong mi long Saut Korea na United States ol i bungim mani na salim i kam na mipela yusim long sanapim dispela haus karim,” Kim i tok.

Pater Kim wantaim komyuniti bilong em i amamas olsem haus karim i sanap pinis na klostu taim bai i op. Haus karim i gat wod bilong karim, klinik, stua, na rum bilong waswas.

Ol narapela komyuniti bilong lain Del-Aina Kawale, Yuri na Dimaku husat i gat manmeri moa long 15,000 i ken bringim mama i laik karim i kam long Dirima Komyuniti Helt Pos.

Haus karim long Dirima bai helpim long daunim namba bilong ol mama husat i dai long taim ol i gat bel na long taim bilong karim.

Dispela kantri i gat bikpela namba bilong ol mama i save lusim laip bilong ol long taim bilong karim insait long Weten Pasific Rijon.

Wanpela mama, Maria Dulume i tok amamas long Pater Pita Kim na famili bilong Pater Kim long luksave long nid bilong ol Dirima na Gumine na givim mani long sanapim haus karim.

Elizabeth Koai, meri i lukautim Kundiawa Daiosisen Helt Sevis i tok Dirima Komyuniti Helt Pos bai i gat foapela woklain. Wanpela bilong dispela woklain bai i lukautim haus karim. Em wanpela wokmeri husat i kisim trening long helpim mama karim bebi.

Dirima Komyuniti Helt Pos i stap aninit long Katolik Helt Sevis.