I GAT ripot long midia insait long PNG olsem kebinet i bin givim tok orait long wanpela sabmisen long wanpela kampani we bai mekim ol test long ol drag bilong pait egensim COVID-19, na banisim ol pipel bilong kantri long dispela sik.

Ol pepa i raun long sosel midia platfom, i givim nem bilong sampela ol bisnis lain, ol lain long National Aids Council na tu sampela saintis bilong University bilong Papua New Guinea, husat i stap insait long dispela nupela kampani Niugini BioMed Limited.

Ol dispela saintis bilong dispela nupela kampani i bin askim nesenel gavman long K10.2 milien long wok bilong ol. Ol i tok ol i painimaut wanem ol marasin inap long stopim COVID-19.

Wanpela saveman bilong ol vairus, na man husat i bin dairekta bilong PNG Institute of Medical Research bipo, Doktor Peter Siba, i tok i no gat klia toktok i stap insait long dispela nupela dil na i gat pasin hait i stap long en tu.

Dr Siba i gat moa askim tu long save na ekspiriens bilong ol lain i stap insait long dispela nupela kampani na i go pas long traim painim wanpela marasin bilong stopim coronavirus.

Niugini BioMed Limited i go pas long dispela wok painim tasol planti tok pait i kamap we i askim bilong wanem na gavman i no yusim PNG Institute of Medical Research long mekim dispela wok.

I no gat klia toktok tu long olsem wanem dispela plen i bin kamap na mani i go insait long dispela bikpela wok.