WESTERN Pacific University (WPU) long Ialibu, Sauten Hailans Provins bai i stat kisim ol sumatin long neks yia.

Ol sumatin i ken aplai long stadi long Bisnis Menesmen, E-Bisnis na Digital Maketing, na Kompyuta Saiens we bai i ran long 3-pela yia. Ol sumatin i ken aplai tu long Faundesen Yia.

Faundesen yia em bilong helpim ol sumatin long redi long go insait long ful taim kos bilong 3-pela yia.

Ol sumatin i mas aplai long ol skul liva fom yusim pepa o onlain long dipatmen bilong haia edukesen, saiens, risets na teknoloji.

Olgeta kos long dispela yunivesiti i dijital o bai i ran long kompyuta tasol na bai i no gat moa nid long yusim pepa.

Ol sumatin husat i gat interes long stadi long dispela yunivesiti i ken go long websait bilong WPU long dispela adres www.wpu.ac.pg.

Long dispela yia ol aplikesen i op long ol skul liva tasol. Ol non skul liva bai i wet bihain long 2021.