NESENEL Kontrol Senta bilong COVID-19 long Pot Mosbi i salim sampela saveman i go long Isten Hailans long sapotim ol helt atoriti long apim mak bilong daunim COVID-19.

Ol mausman bilong Nesenel Dipatmen bilong Helt (NDOH), Sentral Pablik Helt Laboratori (CPHL) na World Health Organization (WHO) i bin raun i go lukim Goroka Hausik na ol i toktok pinis long kamapim rot bilong ol sikmanmeri na pikinini na aisolesen fesiliti bilong ol COVID-19 sikmanmeri na pikinini.

“Mak nogut bilong COVID-19 i stap yet long Papua Niugini na mipela i mas i go het long apim mak bilong daunim COVID-19 long olgeta provins.  Ol tim bilong mipela i go het long visitim ol helt fesiliti na luksave long wanem ol nid i stap long stretim na inapim,” Kontrola bilong Nesenel Pendemik Rispons na Polis Komisina David Manning i tok.

Taim ol i bin stap long Goroka yet, dispela tim i bin i go lukim PNG Institut bilong Medikol Risets (IMR) long toktok long test bilong COVID-19 na olsem wanem bai NCC sapotim na stretim ol sevis we IMR i givim long kantri.

I bin i gat ripot bilong 588 keis bilong COVID-19 na 7-pela manmeri husat i bin kisim COVID-19 i dai long kantri. Na long kantri, 14 provins i ripot olsem ol i gat COVID-19 keis.