POT Mosbi Jeneral Haus Sik (PMGH) bai gat wanpela nupela kensa masin bilong sekim kensa long susu o ol i kolim Memogram.

PHA Health Assurance Company Ltd bai givim wanpela nupela memogram long PMGH aninit long wanpela Pablik Praivet Patnasip ol i bin kamapim long las wik Tunde. PHA em i wanpela Helt Insurens Kampani i save lukautim mani bilong ol manmeri long helpim ol long bihain taim ol i sik.

Siaman na Sif Ekseketiv Opisa bilong PHA, Raj Juta i tokim CEO bilong PMGH, Dr Paki Molumi long baim nupela memogram long taim ol i laik wanbel long wokbung wantaim.

“Dispela mun (Oktoba) em i mun bilong mekim awenes long kensa bilong susu na mi luksave olsem PMGH i no gat Memogram o masin bilong painimaut  sik kensa long susu. Olsem na PHA bai baim wanpela nupela memogram na givim long PMGH long helpim ol mama long PNG.

“Mama bilong mi i bin kisim kensa long susu bilong en taim em bin 48 krismas tasol em i bin kisim ol gutpela helt sevis na nau em i orait na em i stap laip. Krismas bilong en i nau 75. Em inap long kisim gutpela helt sevis bikos em i bin baim insurens o sevim mani bilong taim nogut na sik olsem. Na long taim em i kisim kensa long susu bilong en, dispela mani em i bungim i bin helpim em long kisim gutpela sevis,” PHA Siaman na CEO Juta i tok.

Tasol, em i tok moa olsem, gutpela helt em i rait bilong olgeta manmeri, maski sapos ol i gat mani long kisim gutpela helt sevis, o sapos ol i no gat, ol i mas i gat gutpela helt sevis.

Em i tok aninit long dispela patnasip, PHA bai stretim ol infrastraksa bilong PMGH na ol sikmanmeri husat i gat mani na i no gat mani, i ken kisim wankain gutpela helt kea.  

 Sif Ekseketiv Opisa bilong PMGH, Dokta Paki Molumi i tok dispela nupela masin em bai namba wan taim bilong PMGH long kisim insait long haus sik. Na tu, em i namba wan taim long kantri long kisim nupela memogram.

“Rotary Club i bin givim wanpela memogram long PMGH 15 krismas i go pinis, tasol em i no nupela memogram. Em i olpela na em i no save wok gut,” Dr. Molumi i tok.

Rebecca Negere i raitim