NESENEL wel na gas kampani bilong PNG, Kumul Petroleum i givim 6-pela ventileta na 6-pela breathing circuit o raba bilong pulim win i go long Intensive Care Unit (ICU) long Pot Mosbi Jenerel haus sik.

Ol dispela masin bilong sevim laip em ol laspela medikol ikwipmen we Kumul Petroleum i bin promis long givim long Pot Mosbi Jenerel haus sik.

Dispela ol ventileta em Savina 300 i mekim na saplaim. Ol bai helpim ol sikmanmeri husat i gat hevi long pulim win na mentenim oksijen long blut bilong ol.

Ol dokta i ken menesim tritmen bilong ol sikmanmeri  wantaim ol dispela ventileta. Antap long dispela, ol ventileta i kam wantaim breathing circuit.

Mani mak bilong wanpela ventileta em K117,000 na K702,960.00 long 6-pela wantaim.

Bungim olgeta wantaim ol breathing circuit na ol arapela medikol ikwipmen we Kumul Petroleum i bin givim, olgeta dispela i kostim K964,781.40.

Sif Ekseketiv bilong Pot Mosbi Jenerel Haus sik, Dokta Paki Molumi i tok Pot Mosbi Jenerel Haus sik em i bikpela haus sik long Papua Niugini na olgeta dispela donesin bai helpim na sevim laip bilong ol pipel long PNG.

Em i tok ICU bilong Pot Mosbi Jenerel Haus sik em wanpela bisi hap we i gat 8-pela bet bilong ol sikmanmeri long NCD na ol narapela riferel bilong ol arapela provins.  Na tu ol lain husat i gat COVID-19.

“Long  taim COVID-19 i bin kamap, Kumul Petroleum Holdings Limited i bin givim 15 ICU bet we i sevim planti laip bilong ol sikmanmeri” Dokta Molumi i tok.

“Long strongim na sapotim visen bilong Kumul Petroleum, em i wok bilong mipela long mentenim gutpela helt, seifti na welbing. Mipela i bilip olsem em wok bilong mipela long sapotim kantri,”

 Menesin Dairekta bilong Kumul Petroleum, Wapu Sonk i mekim dispela toktok long taim em i givim dispela donesen.

Antap long dispela , Kumul Petroleum i bin mekim sampela donesen long Jun, Julai na Ogas.

Na i bringim invesmen bilong kampani i go long Pot Mosbi Jenerel ICU long mani mak olsem K1,647,384.00

Carolyne Ketsimur i raitim