MAK bilong helt kea long ol haus sik insait long Gazelle Distrik na tupela bikpela haus sik aninit long Is Nu Briten Provinsal Helt Atoriti, bai i go antap long narapela mak bikos long ol nupela bet ol i kisim.

Opis bilong Memba bilong Gazelle na nau Minista bilong Sivil Eviesen,  Jelta Wong i givim 110 bet wantaim matres i go long ol rurel helt fesiliti we PHA i luksave long en na tu St Mary’s Vunapope Haus Sik long Kokopo na Nonga Bes Jeneral Haus Sik long Rabaul Distrik.

Minista Wong i tok dispela em i wanpela bilong ol planti ektiviti Gazelle Distrik i mekim long apim kea bilong ol sikmanmeri long ol helt fesiliti.

“Planti bilong ol helt fesiliti i gat ol bet ol i wokim long plang longtaim yet, na nau i bagarap pinis. I no gat ol samting bilong holim drip o suga wara na ol helt woka i save painim rot long sanapim suga wara,”Minista Wong i tok.

“Ol dispela nupela bet mipela i bringim i kam i gat ol matres wantaim na tu ol i fleksibel  long muvim i go i kam long inapim nid bilong sikmanmeri na pikinini. Mipela i bringim tu ol nupela pos bilong sanapim ol suga wara,” Minista Wong i tok.

Ol wokmanmeri bilong Gazelle ilektoret i bin givim aut ol dispela bet long namba wan wik bilong mun Oktoba.

Nonga Bes Jeneral Haus Sik, St Mary’s Vunapope Haus Sik na Warangoi Rural Haus Sik i kisim 10-pela bet wan wan.

Ol narapela 80 bet i go long Vunapaka Helt Senta, Livuan De Klinik, George Brown na Rarongo Etpos long Livuan Reimber LLG, Navunraram De Kilnik, Napapar Helt Senta na Kerevat Rural Haus Sik long Sentral Gazelle LLG, Paparatava Helt Senta, Tapipi Helt Senta, Rapitok na Rabagi Et Pos long Toma Vunadidir LLG, Gaulim Helt Senta, Vunapalading, Utmei, Mandres, Warakidam na Kamanakam Etpos long Inlen Baining LLG.

Opisa husat i lukautim Utmei Etpos, Michael Kapu-u i tok tenkyu long Memba bilong Gazelle na em i tok ol dispela bet em ol bikpela samting long ol sikmanmeri na pikinini husat bai kam slip long haus sik.