Gavana Saonu i bin givim K100, 000 long Nanduo Praimeri Skul na K100, 00 long Wasimbo Luteren Sios long Fincshaffen long las wik Mande long Lae, Morobe Provins.

“Mi laik tok tenkyu long ol foapela papa bilong Nanduo husat i bin sapotim Morobe na PNG wantaim.”

Morobe Gavana Ginson Saonu i bin go lukim Nanduo Viles long Kotek Lokal Level Gavman (LLG) bilong Finshaffen long wok bung wantaim ol long dispel hap.

Dispela i bin makim wankain taim bilong namba 55 Kottec  Seket Konfrens bilong ol ELC PNG long Nanduo long ples.

Dispela ples em long haus bilong bipo Morobe Primia Leit Utula Samana, Boyamo Sali, olpela Sif Seketri long Gavman bilong Leit Sir Manasupe Zurenuoc na Henu Heinsgut.

Gavana Saonu i bin apim nem bilong dispela ples long kamapim dispel kain ol lida na i bin salensim ol pipel long kamapim wankain pipel bilong Morobe na Papua Niugini.

“Dispela ol lidaman i bin wokim bikpela wok bilong kantri na provins pinis olsem na nau yupela nupela jeneresen i mas traim na kamapim wankain lida olsem.” Gavana Saonu i tok.

Gavana Saonu i tokim ol pipel olsem wanpela rot long bringim ol glori de bilong dispela ples wantaim ol nupela risos bilong em kam bek em edukesen. Na dispela K100, 000 em bilong Nanduo Praimeri Skul.

“Dispela skul i gat histori long em olsem na yumi mas mekim moa wok long em i ken kamapim planti nupela Utula, Manasupe, Henu na Boyamo bihaintaim,” em i tok.

Sinia tisa bilong Nanduo Praimeri Skul Gumbi Mutarane i bin lusim ai wara na tok olsem, long taim dispela skul i bin stat long 1950 i no save kisim dispela kain sapot long ol lida olsem na dispela sapot bilong Gavana Saonu em brukim histori bilong skul.

Long wankaint taim Gavana Saonu i bin tok olsem dispela haus lotu long Wasimbio i nidim apgret tu olsem na narapela K100, 000 em bilong ol bildim nupela haus lotu.

Dispela ol mani em bin putim aninit long Sios- Patnasip Program bilong Morobe Provinsel Gavman na em lukluk long divelopim gen historikol haus lotu long Morobe Provins.

“Taim mi bin yangpela, mi save bihainim leit Utula raun long Morobe Provins olsem na mi amamas long kam lukim ples bilong em,” em i tok.

Gavana i bin go wantaim pikinini man bilong Boyamo Sali (Eddie Sali) husat i sinia pasta long Lae Distrik bilong ELC-PNG.