LONG taim ol gret 8 studen bilong Hohola Demonstresen Praimeri Skul, i sindaun long Nesenel Eksamsinesen bilong ol neks wik, bai gat 4-pela spesel inklusiv sumatin bilong Cheshire Homes tu i  sindaun na wokim eksam wantaim ol. 

Dispela ol 4-pela sumatin em yau bilong ol i bagarap, tasol ol i save gut long rit na rait, olsem na  ol redi long joinim ol gret 8 sumatin bilong Hohola Demonstresen skul na wokim eksam wantaim.

Wanpela sinia tisa bilong Hohola Demonstresen Skul, Andrew Landi i tok ol 306 sumatin olgeta bai sindaun long neks wik eksam na ol bai yusim 10-pela klasrum.

“Mipela i bin statim skul wantaim 370 gret 8 sumatin tasol sampela i bin lusim skul bikos long COVID-19 na nau mipela gat 306 tasol bai sindaun long gret 8 eksam,” Mista Landi i tok.

“Bikpela gol na visen bilong Hohola Demonstresen Praimeri Skul em mipela i laik olgeta gret 8 sumatin bilong mipela i mas kisim ples insait long haiskul, wankain tu long ol disabiliti sumatin husat i save joinim mipela olgeta yia,” em i tok.

“Long taim bilong eksam em tisa bilong ol dispela spesel disabiliti sumatin i stap long Gerehu bai kam long sapotim ol bikos mipela bai hat long helpim ol wantaim ol arapela gret 8,” em i tok.

“Dispela inklusiv edukesen i bin stat long 2018 na Hohola Demonstresen skul i bin wanpela gavman praimeri skul tasol i bin yusim dispela gavman inklusiv edukesen program bilong ol spesel sumatin insait long NCD,” Gret 8 tisa, Kimberly Mecksaine i tok.

Mis Mecksaine i tok dispela ol spesel sumatin i save long rit, rait na lukim maus bilong ol tisa taim ol toktok insait long klasrum.

“Ol i save mekim poro wantaim ol gutpela sumatin insait long klasrum na ol dispela sumatin i save helpim ol long sampela skul wok,” Mis Mecksaine i tok.

Em i tok dispela 4-pela spesel sumatin bai sindaun long wanpela klasrum wantaim spesel tisa bilong ol long taim bilong eksam.

“Mipela i traim long ranim dispela gavman polisi kamap gut na helpim ol dispela kain spesel pikinini bikos kantri bilong yumi i tok olsem olgeta pikinini i gat rait long kisim edukesen na dispela em bilong gutpela na nogut wantaim,” Mista Landi i tok.

“Nau mipela i wok strong long bringim dispela inklusiv edukesen i go antap long narapela mak na toksave long husat papamama i gat dispela kain pikinini i mas putim long skul na larim ol kisim kwaliti edukesen,” Mista Landi i tok.

Jacklyn Kimala i raitim