TWENTI sumatin i greduet long namba wan taim long nupela Mums Pri Skul long Goroka, Isten Hailans, long Fraide tupela wik i go pinis.

Het tisa bilong skul Rodi Taelobu i tok dispela ol sumatin em planti bilong ol i kam long ol setelmen olsem Genoka na Piswara i bin skul long las tupela yia na nau i greduet.

“Olsem meri na mama i go pas long dispela skul, mi amamas long lukim dispela ol sumatin i pinisim skul na greduet,” Taelobu i tok.

“Ol nau i ken i go na skruim skul bilong ol long ol praimeri skul long taun o long narapela senta.”

Taelobu i tok Momon sios (Church of Jesus Christ of the Latter-Day Saints) long Goroka husat i bin tok orait long kisim dispela ol yangpela sumatin na trenim ol insait long banis bilong sios.

Taelobu i tok, Mums pri-skul i wok long Goroka na nau i lukim namba wan greduesen bilong em

Em i tok dispela skul i gat ol arapela sista skul long ol narapela senta olsem Wewak long Is Sepik Provins, Popondetta (Noten), Madang, Rabaul (Is Nu Briten), Lae (Morobe) na Kudjip (Jiwaka).

Em i tok ol sumatin long dispela ol skul bai greduet tu long namba wan taim sampela taim long dispela yia na sampela bai greduet long neks yia.

Sape Metta i raitim