OLGETA pablik praimeri na sekenderi skul insait long NCD i gat dispela wik tasol bihain long ol bai kisim tem 3 holide bilong ol long Fraide 25 Septemba, 2020.

Ol sapos long kisim 2-pela wik holide stat long las wik bihainim kalenda bilong skul tasol bikos long COVID-19 lokdaun i bin abrusim kalenda bilong skul olsem na ol bai kisim long dispela wik Fraide.

Olgeta skul bilong arapela provins i bin kisim tem 3 holide bilong ol pinis na neks wik ol bai statim nomol klas gen taim ol skul long NCD bai stap long holide.

Dispela i no asua bilong skul tasol COVID-19 lokdaun i bin pasim olgeta wok na skul wantaim long tingim helt na seifti bilong ol sumatin insait na ausait bilong skul.

Planti sumatin i bin lusim skul bikos long COVID-19 lokdaun, na sampela ol stap nating long haus na lusim tingting long skul tasol sampela tingim edukesen na nau ol redi long kisim holide bilong ol.

Sampela skul i redi long mekim klas kaikai na amamas wantaim olsem ol pinisim tem 3 gut na luk fowat long tem 4 bilong ol inap krismas.

Planti pikinini i amamas long go pinisim holide long wan wan ples bilong ol papamama na kam bek olsem na ol i hariap dispela wik long pinis.

Jacklyn Kimala i raitim