PLANTI pikinini insait long siti i no go long skul bikos ol i no stap wantaim papamama tru bilong ol.

Wanpela singel mama bilong tupela pikinini i mekim dispela tok taim em i amamasim 45 Independens aniveseri wantaim moa long 30 pikinini long haus bilong em long 9-Mail Setelmen long Nesenel Kapital Distrik long las wik Tunde.

Dispela meri em Natalie Tom, bilong Madang na Simbu provins, i tok dispela ol pikinini i stap long “New Literacy College”, skul em yet i statim.

Tom husat i wanpela strongpela Kristen meri i kamapim dispela skul bihain long em i lukim planti ol pikinini husat i no gat papamama i no go long skul tasol i raun nating long setelmen.

Planti bilong ol i save helpim ol manmeri husat i lukautim ol long mekim ol arapela wok olsem mekim maket na mekim ol arapela infomol bisnis long kisim strong na stap.

Tom i wokim wanpela hap bilong haus bilong em i kamap olsem klasrum.

Tom i tok sapos ol pikinini i raun long laik bilong ol na painim hat long stap na ol manmeri i no lukauti ol, dispela bai inap kamapim bikpela hevi long bihain taim.

“Taim Jisas Krais i stap long dispela graun em i no go na stap wantaim ol manmeri i gat planti mani na kago na ol man gat biknem. Nogat.

“Em i save go na stap wantaim ol tarangu na ol rabis manmeri na i save helpim ol manmeri we sosaiti i no laikim.

“Mi lukim olsem namba bilong ol manmeri i stap tarangu bai go bikpela insait long Pot Mosbi long bihain taim olsem na nau yet yumi ken lukim planti pikinini i no stap wantaim papamama bilong ol.

“Edukesen em i bikpela samting bikos em bai senisim tingting na pasin bilong ol pikinini na helpim ol long gat gutpela sinadun long bihain taim.

“Mi statim dispela Nupela Litresi Kolis long helpim ol pikinini husat i no go skul na i stap nating long setelmen,’’ Tom i tok.

Willie Brul i raitim