UNICEF Spot Lait Program em gutpela program bilong helpim ol skul sumatin insait long kantri long divelopim tingting bilong ol yangpela pikinini man na lukautim ol yangpela meri insait long wan wan skul bilong ol.

Seketri bilong Edukesen Dokta Uke Kombra i bin opim dispela program long Boreboa Praimeri Skul insait long Nesenel Kepital Distrik wantaim bilong UNICEF na Guidance na Kaunseling Divisen.

Dairekta bilong Saunten na Hailans Rijon, Lepapar Haoda i tok dispela program i gat 10-pela skul long NCD, Westen Hailans Provins na Morobe long Nawaeb rurel ples.

“Mipela i no gat gutpela kaunseling skul bilong ol sumatin yet tasol mipela i askim ol tisa bilong wan wan skul yet long givim kaunseling long ol sumatin na painim aut long husat sumatin meri bungim jenda beis vailens,” Haoda i tok.

Em i tok dispela rot bai helpim ol studen long kisim helpim long ol ogenaisesen kain olsem Famili Helt Sevis, Seksuel Ofens skwat.

“Dispela Spot Lait Program em i bilong helpim ol sumatin meri wantaim jenda beis vailens na disabiliti  bikos olgeta klasrum i no gutpela long lukautim olgeta pikinini wantaim,” em i tok.

Em i tok long dispela yia ol i lukluk long dona fanda UNICEF long helpim long dispela program long olgeta skul.

Em i tok long nau ol i no gat kaunsila tasol ol i gat sampela tisa husat i laik helpim nating na kisim dispela wok long gutpela bilong dispela nesen.

“Mipela bai askim wan wan provins long putim dispela posisen insait long wan wan skul bikos nau em UOG trenim ol tisa long mekim dispela kaunsiling wok,” em i tok.

“Mipela i bilip olsem long bihain taim, ol Tising Komisin Sevis wantaim sapot bilong ol provins bai i gat posisen bilong dispela Spot Lait Program i stap we bai ol tisa i ken bihainim long helpim ol pikinini,” em i tok.

Jacklyn Kimala i raitim