Wok bilong mekim Dirima etpos haus sik i kamap Komyuniti Helt Pos level 1 long Dirima/Yani long Gumine, Simbu provins bai pinis klostu taim.

 Dirima etpos i stap aninit long lukaut bilong Katolik Helt Sevis bilong Kundiawa Daiosis.

Bos meri bilong Katolik Helt Sevis, Elizabeth Koai i tok jeneral wod bilding bai pinis long namel bilong dispela mun.

 Ms Koai i tok Dirima/Yani komyuniti helt pos i ken helpim 10,000 manmeri na pikinini bilong Dirima/Yani na ol arapela komyuniti i stap klostu.

Ms Koai i tok amamas long Gumine Distrik Developmen Atoriti (GDDA) long kamapim tingting long wok bung wantaim Katolik Helt Sevis long apim level bilong Dirima etpos i go antap long mak bilong Komyuniti Helt Pos.

Bos bilong Katolik Helt Sevis i tok wok bilong kamapim jeneral wod bilding i bin stat long mun Julai wantaim K150,000 mani i kam long GDDA.

“Dispela jeneral wod bai helpim long skruim wok bilong givim sevis i go long ol meri, ol lapun na ol pikinini long wanem Gumine sab helt senta i stap longwe olsem tri kilometa long Dirima,” Koai i tok.

Em i tok Katolik Helt Sevis bai givim Dirima/Yani tupela moa helt woka, mekim namba bilong helt woka i kamap foapela (4), tupela komyuniti heltwoka, wanpela nes, na wanpela nes bilong karim bebi.

Inspeksen na odit ripot i kam long opisa bilong Woks Dipatmen i no long taim i go pinis i soim olsem wok i kamap long haus sik bilding i stap long mak bilong Nesenel Woks Depatmen, Ms Koai i tok.

“Olsem na mi tok tenkyu long Nimeson Construction Limited long gutpela wok kampani i mekim long wok i mas pinis long taim stret, GDDA na memba bilong Gumine Nick Kuman long givim mani bilong DSIP na Katolik Het menesmen long wok bung wantaim long kamapim haus sik bilding,” Ms Koia i tok.

 Dairekta bilong Nimesons Construction, Gabriel Pari Nime i tok gutpela helt bilong Dirima/Yani komyuniti bai helpim developmen long kamap long ples na em amamas long wokbung wantaim GDDA na Katolik Helt Sevis long mekim wok long kamapim gutpela helt long komyuniti.

Mista Nime i tok jeneral wod hausik bilding i gat 9-pela rum. Wan wan rum i gat toilet na ples bilong waswas bilong man na meri wantaim. Wok bilong plama i pinis na wok bilong putim pawa lain na koneksen bai kamap long wik bihain.

“Mi luksave tu long komyuniti long sapot bilong ol long projek long mekim hausik bilding. Sapot bilong komyuniti i strongim mi long pinisim dispela haus sik bilding we i ken lukautim helt bilong Dirima/Yani komyuniti,” Nime i tok.

Ennio Kuble i raitim