UNITED Nations Population Fund (UNFPA) i givim ol Pesenel Protektiv Ikwipmen (PPE) i go long Papua Niugini long sapotim ol long rispon long hevi bilong COVID-19 i no long taim i go pinis.

Dispela sapot i bai helpim ol helt woka husat i stap paslain long daunim COVID-19 long ol provins we i gat keis bilong COVID-19. Teknikol Speselis na Hetmeri bilong Helt Program long UNFPA , Dokta Titiola Duro-Aina i tok UNFPA i sapotim rispon bilong COVID-19 wantaim moa long K1milien pinis.

Dispela ol PPE em bilong sapotim ol femili plening klinik/MCH na ol famili Sapot Senta long ol helt fesiliti insait long ol dispela provins olsem Westen Provins, Atonomos Rijon Ov Bogenvil, Nesenel Kepital Distrik, Westen Hailans Provins, Is Nu Briten Provins, Morobe, Sauten Hailans Provins na Milen Be Provins.

“Mipela i laik helpim ol helt woka long dispela ol provins we i gat COVID-19 bikos ol helt woka i pret long givim sevis long ol sik manmeri bikos ol i nogat ol PPE. Ol i pret long helpim ol sikmanmeri bikos ol i pret long kisim COVID-19,” Dokta Duro-Aina i tok.

Dokta Duro-Aina i tok ol meri i save bungim hevi olgeta taim na COVID-19 i mekim hevi  bilong ol meri i go bikpela tru. Olsem na em i tok UNFPA i tingim ol meri long dispela taim nogut na i givim ol dispela PPE.

Em i tok moa olsem 70 pesen bilong ol helt woka long wol em ol meri na ol meri em ol lain we i save kisim bikpela bagarap long Jenda Beis Vailens (GBV) we namel long  COVID-19 hevi planti GBV keis i kamap na tu seksual na riprodaktiv helt sevis i no bin op namel long COVID-19 olsem na ol meri i bin kisim bikpela taim.

Rebecca Negere i raitim