Mak bilong Braun Helt Senta long Finsafen, Morobe Provins i go antap long level 4 distrik haus sik.

Braun Helt Senta i kisim dispela luksave bikos long gutpela mak bilong helt sevis em i save givim long ol pipel long Finsafen na Morobe provins.

Ekting Menesa bilong kuretiv stended na odit long Dipatmen bilong Helt, Peter Pindan i luksave long gutpela wok bilong dispela haus sik long helpim ol pipel na i tokaut long dispela taim em i givim setifiket bilong agrigesen na ripot we i soim mak bilong dispela haus sik.

Mista Pindan i tok Braun Helt Senta i bin soim olsem em inap long i go antap long narapela mak sampela krismas i go pinis.

Em i tok, maski dispela haus sik i stap aninit long lukaut bilong sios, Evangelical Lutheran Sios bilong PNG, dispela haus sik i ken givim gutpela helt sevis long ol pipel.

Em i tok distrik na sios i bin wok hat long apim mak bilong Braun Helt Senta i go antap long level 4 haus sik long distrik tasol wok bilong gavman i mekim ol i isi isi.

Mista Pindan i tok ol i no wansait o mekim disisen long apim mak bilong haus sik nating, haus sik i soim gutpela mak olsem na ol i apim mak bilong en.

“Sapos mipela i daunim mak bilong haus sik, gutpela sevis tu bai pundaun na bai mipela i putim laip bilong ol sikmanmeri long mak nogut,” em i tok.

Em i tok aninit long Nesenel Helt Ekt long PNG gutpela mak em i bikpela samting. Em i tok antap long gutpela mak ol helt woka bai bihainim na givim gutpela helt sevis.

Mista Pindan i tok tenkyu tu long Braun Helt Senta long givim trening long ol sumatin nes, komyuniti helt woka, dokta na helt ektensen opisa na ol arapela helt profesenel long PNG.