PARI Elementri Skul insait long Nesenel Kepital Distrik i opim nupela laibri long dispela wik Tunde.

Nesenel Kepital Distrik Deputi Gavana na Presiden bilong Motu Koita Assembly Dadi Toka wantaim Sif Operesen Opisa bilong Steamship Ltd Rupert Bray na ol tisa bilong Pari ples elementri skul na ol arapela opisal bilong Buk Bilong Pikinini i bin bung wantaim ol elementri pikinini long opim nupela laibri bilong ol.

Deputi Gavana bilong NCD Dadi Toka i tok dispela laibri i gat olgeta buk bilong kamap wanem kain man meri long bihain taim na tu em bai helpim yupela ol pikinini long kamap namba wan Dokta, pailot na planti samting.

Em i bin askim ol elementri pikinini na olgeta i resis long kolim nem bilong wok we ol i laik kamap bihain taim.

“Mipela i amamas long patna wantaim Pari Elementri skul tisa na ol pikinini long opim dispela nupela laibri,” Sif Operesen Opisa bilong Steamships Ltd Rupert Bray i tok.

Em i tokim ol pikinini long stadi strong na long kamap gutpela dokta, pailot, loya na kisim ol arapela bikpela wok insait long kantri.

Em i salensim olgeta tisa na pikinini bilong Pari elementri skul long stap seif olgeta taim na yusim gut laibri bikos em i masta ki bilong edukesen laip.

Het tisa bilong Pari elementri skul Mista Vagi Oru i tok bikpela tenkyu long Steamships Ltd long patnasip na NCD long luksave na kam sapotim ol long opim dispela laibri bilong ol pikinini.

“Mipela i amamas tru olsem wanpela bilong ol rurel elementri skul i gat dispela kain gutepla laibri we i ken givim gutpela kwaliti edukesen long ol pikinini bikos dispela em faundesen bilong pikinini tai mol i gro go antap long narapela level,” Mista Oru i tok.

Em i tok bikpela tenkyu tu long olgeta tisa bilong Pari elementri skul na Buk Bilong Pikinini long bikpela hatwok na bilip bilong ol i mekim ol i gat nupela laibri.

“Nau ol pikinini bai stat yusim dispela laibri we i gat kain kain stori buk bilong ol pikinini na ol skul buk tu bai helpim ol long rit na rait moe,” em i tok.

Jacklyn Kimala i raitim