“OLGETA pikinini i mas kisim kwaliti edukesen bikos em bikpela samting we i ken divelopim dispela nesen,” Sekretri bilong Edukesen Dokta Uke Kombra i bin mekim dispela tok long taim bilong opim ol buks na posta long sapotim program long Boreboa Praimeri skul long Pot Mosbi long las wik.”

Dispela Lait Spot Divisen Program i bin makim 10-pela praimeri skul insait long NCD, WHP na Morobe long wok painimaut lukaut Program bilong 2020.

“Olgeta papamama, tisa na edukesen dipatmen i mas mekim olgeta pikinini i mas kisim gutepla edukesen na kamap pablik opisa, pailot, tisa na dokta bilong kantri bikos ol i lida bilong kantri long bihain taim,” Dokta Uke Kombra i tok.

Kombra i tok dispela program em bilong promotim jenda ikwaliti na gutpela bilong ol meri spot we i ken givim balens long tupela man na meri sumatin wantaim long kisim save.

“Planti bilong ol yangpela meri insait long rurel ples i no gat gutpela edukesen na stap nating olsem na Kaunseling Divisen bilong Dipatmen i patna wantaim UNICEF PNG long luksave long dispela hevi na givim sans long ol meri i mas kisim wankain ekukesen,” Kombra i tok.

Em i tok sampela komyuniti long rurel ples ol meri i no save go skul bikos long kalsa laipstail i save stopim ol, olsem na Spot Lait program i kamap long helpim ol long edukesen.

“Mipela i opim dispela program long helpim ol meri na painimaut long husat ol yangpela meri i save kam wantaim Jenda Beis Vailens GBV long skul tu,” em i tok.

“Dispela program i ken helpim ol long painimaut na strongim tingting bilong ol long kisim moa edukesen na kamap wanpela gutpela lida meri bihain taim,” em i tok.

“Mipela i statim long 7-pela provins pinis na i laik surukim wok i go yet long olgeta provins insait long kantri bikos dispela i ken divelopim nesen,” em i tok.

Olgeta skul bai gat wan wan kaunsil bilong ol we i ken givim toktok bilong dispela program.

Jacklyn Kimala i raitim