UNFPA i givim mani long stretim wod bilong karim bebi long Matkomnai Sab-Helt Senta long Westen Provins i no long taim i go pinis.

Wod o rum bilong karim bebi long Matkomnai Sab-Helt Senta i save helpim ol mama long 11-pela viles long Westen Provins.

Sista Philomena, Menesa bilong Matkomnai Sab-Helt Senta i tok, dispela rum em i liklik tru na i gat wanpela windua tasol na ol sotpela lain tu i ken holim siling.

“Em i hot tumas, na em i no gutpela tru long ol mama o ol helt woka. Planti taim mipela wok insait long hia mipela i save tuhat bikpela tru.

“ Olsem na mipela i laik mekim senis. Mipela i laik mekim dispela rum i kamap gutpela na klinpela na ol mama na ol bebi i bai amamas long stap insait,” Sista Philomena i tok.

UNFPA i bai helpim Sista Philomena na ol tim bilong en long mekim dispela tingting bilong ol i kamap tru tru.

Renovesen bilong Matkomnai i stat long dispela wik na ol i ting olsem ol i bai pinis bihain long sikispela wik. Insait long dispela taim ol i bai apim ruf na mekim windua i go bikpela. Dispela bai mekim wod i luk nais, kolwin bai go insait na ol mama na ol helt woka bai amamas long yusim dispela wod.

Dispela renovesen bilong Matkomnai em i wanpela bilong ol sampela helt kea fesiliti developmen we Secretary General’s Multi-Partner Trust Fund bilong COVID-19 i sapotim long en.