UNICEF i givim 7 pela kompyuta i go long Nesenel Dipatmen bilong Helt (NDOH) long sapotim wok bilong ol wokmanmeri long Helt Promosen Brens long dipatmen.

Ol i givim tu tupela dijital kamera, wanpela ovahed projekta na wanpela skena.

UNICEF i givim ol dispela samting long NDOH bihain long NDOH i singaut long helpim long strongim wok bilong Helt promosen brens bilong dipatmen.

Ekting Helt Seketeri Dokta Paison Dakulala i amamas long dispela helpim i kam long UNICEF na i tok dispela helpim i kam long taim we ol i nidim stret. Em i tok ol dispela kain ikwipmen bai strongim wok bilong ol long i go pas long daunim sik COVID-19.

“Ol helt promosen tim bilong mipela inap long stap long fralain long daunim COVID-19 na ol arapela sik tasol ol i no gat inap ikwipmen, trening na save. Ol dispela ikwipmen olsem kompyuta nau i kam bai helpim ol long karimaut gut wok bilong ol,” Dokta Dakulala i tok.

 Em i tok moa olsem, ol pipel nau i laikim ol stretpela infomesen bilong ol hevi bilong helt na COVID-19 tu. Olsem na em i amamas tru long UNICEF long givim ol dispela samting. Ol dispela samting bai helpim ol long givim aut ol  stretpela infomesen long ol pipel.

“Ol faivpela nupela wokmanmeri bilong Helt Promosen tim i nau bai gat leptop kompyuta long mekim wok bilong ol,” Dokta Dakulala i tok. 

Ekting Ekseketiv Menesa bilong Pablik Helt Divisen na Menesa bilong Helt Promosen Brens Dokta Daoni Eserom tu i tok tenkyu long UNICEF long helpim bilong ol.

“I gat bikpela nid long strongim ol pipel bilong mipela wantaim ol besik save na infomesen long gutpela bilong helt na rot bilong lukautim ol yet. Olsem na wok bilong Helt Promosen Program em i bikpela tru long dispela taim,” Dokta Daoni i tok.