INISTA bilong Helt na HIV AIDS Jelta Wong i tok olsem Nesenel Dipatmen bilong Helt i no givim tok orait long Papua Niugini long testim o traim ol sut marasin bilong COVID-19.

“Mi bin kisim planti askim tru long ol ripot i tok long test bilong COVID-19 sut marasin i kamap long Papua Niugini. Namba wan, mi laik tokaut olsem wanem kain test i laik kamap long kantri bai go long Medical Research Advisory Committee (MRAC) long Nesenel Dipatmen bilong Helt long sekim na givim tok orait.

“Mi laik tok klia tu olsem i no bin gat kain ol askim i kam long MRAC. Mi laik tok olsem i no gat wanpela test i kamap long kantri o ol manmeri long Papua Niugini,” Minista Wong i tok.

Ripot bilong 48 wokmanmeri bilong Ramu Nickel husat i kisim test bilong sut marasin i no klia yet. Kontrola David Manning i raitim pas i go long Gavman bilong Saina long Embeseda Xue Bing long givim ol infomesen.

“I gat 6-pela sut marasin long wol i nau stap long test na i kamap pinis long level 3. I gat 4-pela level. Mipela i wet tasol long World Health Organization long givim risal bilong olgeta test bilong ol lain i wokim sut marasin,” Minista Wong i tok.