PALAMEN long las wik i mekim ol senis long we ol gavman yunivesiti long kantri bai ran.

Dispela ol senis i kisim tu ol tok lo olsem Haia na Teknikal Edukesen Rifom Bil 202, Haia Edukesen Jenerel Provisen Amenmen Bil 202, Edukesen Amenmen Bil 202 na Nesenel Trening Kaunsil Amenmen Bil 2020.

Ol arapela senis em long Yunivesiti ov Papua Niugini Amenmen Bil 202, Papua Niugini Yunivesiti ov Teknoloji Amenmen Bil 202, Papua Niugini Yunivesiti ov Netural Risos na Envairomen na Yunvisiti ov Goroka.

Ol haia na teknikal institusen we i givim ol pos-sekendari edukesen nau bai go long Dipatmen bilong Haia Edukesen, Risets, Saiens na Teknoloji (DHERT).

Dispela ol senis bai lukim Minista i gat pawa long go insait na sekim ol wok bilong yunivesiti.

Ol rifom bai lukim olgeta yunvisiti i wok aninit long wanpela lo na menesmen sistem.

Seketari bilong Dipatmen bilong Haia Edukesen Pater Jan Czuba i tok nau yet planti ol yunivesiti i wok long laik.

Em i tok ol kaunsil i kamap olsem wanpela gavman we ol i laik kisim na rausim ol tisa long laik na i laik kamapim ol kain kain program long laik.

“Ol yunivesiti i mas wok aninit long wanpela sistem na i mas kamapim ol skul we i bungim nid bilong kantri,” Pater Jan i tok.

Long tok pait long kamap bilong dispela ol senis long palamen las wik, Memba bilong Yangoru Sausia, Richard Maru i toke m i no gutpela ol yunivesiti kamapim ol wok long tingting bilong ol.

Em i givim piksa long Yunivesiti long Goroka we bipo i stap olsem yunivesiti bilong kamapim ol tisa tasol nau i go insait long kamapim kain kain program.

Em i tok dispela i mekim namba bilong ol tisa long go long ol skul i sot.

Moa yet, yunivesiti nau i laik kamapim wanpela medikal skul we kantri i gat pinis medikal skul long Yunivesiti bilong Papua Niugini na Divine Word Yunivesiti long Madang.