NATURE Park i bin kisim namba 5 yia trenspot sapot bilong Nesenel Kepital Distrik NCDC long divelopim na skulim ol pikinini wantaim Natural Environmen na kalsa.

Long olgeta yia ol sumatin bilong wan wan skul insait long NCDC i save kam raun na lainim sampela skul bilong lukautim envaironmen na enimol wantaim kalsa long bihain taim.

Sif Ekseketiv Opisa bilong Pot Mosbi Nature Park Mis Michelle McGeorge i tok Nature Park i bin eduketim moa long 34,000 sumatin na givim edukesenel program we i ken sapotim ol tisa na sumatin wantaim long save moa long rot bilong lukautim Natural envaironmen na kalsa.

“Planti bilong ol sumatin i gro long siti na i no save gut long kalsa na laip bilong ples olsem na dispela program we Nature Park i save givim long olgeta yia em gutpela long divelopim ol yangpela pikinini i ken gro wantaim na bihain bai ol no nap faul long mekim wok,” Mis McGeorge i tok.

“NCD trenspot sapot i save givim gutpela sevis long karim ol skul pikinini kam long Nature Park na go bek bikos sapos no gat trenspot em bai no gat ol sumatin,” em i tok.

Em i tok dispela em gutepla program bilong ol pikinini we ol bai lainim na save moa long rot bilong lukautim enimol, Natural envairomen na kalsa bikos ol nambawan rot bilong divelopim nesen.

Lainim kalsa na soim olsem trutru yumi em Papua Niugini bikos taim yumi go raun long arapela kantri em bai isi long yumi.

Jacklyn Kimala i raitim