MEMBA bilong Not Waghi Dokta Fabian Pok i bin givim K1.5 milen skul fi sabsidi long olgeta skul insait long distrik.

Ol prinsipel na bod i laik stopim ekademik yia na laik salim ol sumatin i go long haus bikos i no gat mani tasol Mista Pok wantaim distrik atoriti i kamap long rait taim stret na helpim ol.

"Nesenel gavman i stopim TFF na ol skul long elementeri, praimeri, hai na sekenderi i kisim bikpela taim.

"Ol papamama i ting olsem gavman i baim yet na ol malolo na ting olsem ol het tisa na bod i giaman taim ol i askim ol long baim hap bilong papa mama na ol komponen fi.

"Tasol mipela i lukim olsem trutru ol i bungim hevi na mak bilong pasim skul.

"Mipela i no laikim dispela long kamap bikos edukesen bilong ol pikinini bilong yumi insait long Not Waghi i bikpela tru olsem na mipela i mekim disisen long kam insait na sapotim long baim hap bilong ol papa mama fi," Mista Pok i tok.

Ol hetmasta, prinsipal na bod bilong ol skul kain olsem Pater Peter Fatima Sekenderi, Waghi Valley Sekenderi, Milep Luteran Hai Skul na Sigri Praimeri i tokaut stret olsem mani i go pinis insait long skul akaun na ol i kisim pinis.

Waghi Valley prinsipal Betty Wena i tok tenkyu long Mista Pok wantaim DDA (distrik divelopmen atoriti) long kam long dispela kain taim long sevim ekademik yia.

"Mipela i ran daun long mani na laik pasim skul stret taim lokal memba i kam insait na mipela i amamas tru.

"Lokal memba (Pok) em i wanpela gutpela lida we i wok long putim edukesen bilong ol pikinini i go pas.

"Em i bin peim skul fi bilong planti tausen pikinini long Not Wagi we i stap long koles na yunivesti planti yia i go pinis na nau em i halivim ol praimeri na hai skul bikos gavman i mekim disisen long halivim ol teseri instituesen long HELP prokrem," Misis Wena i eksplein.

Ol skul we i kisim mani em 67 elementeri skul, 32 praimeri skul, tripela hai skul na tripela sekenderi skul we 28,139 sumatin olgeta bai kisim sapot.

Mista Pok i tok moa olsem long las sikspela krismas em i bin baim pinis K12 milen long ol Not Waghi sumatin husat ol i stadi long kolis na yunivesti.

"Mipela i helpim ol 14,000 sumatin pinis long ol sikspela yunivesti na ol teknikol na praivet instituesen.

"Planti i greduet pinis na i wok olsem loya, akaunten, tisa, dokta, nes, egrikalserelis, na enjinia na sampela i painim wok yet.

"Mipela i amamas long dispela progres na bai mipela i kontinu long bai skul fi bikos mipela i bilip long edukeitim ol umen risos bilong Not Wagi, Jiwaka na PapuNiugini," Mista Pok i tok.

HOFFMAN GULGARYE i Raitim