WANPELA bilong ol olpela Sekenderi Skul insait long Milne Bay provins long Alotau, i bin wanpela bilong ol arapela skul long Alotau insait long taun ilektoret i bin pas bihain long provins ripotim namba wan COVID-19 keis.

Dispela toksave i bin kam long Opis bilong Provinsel Edukesen Edvaisa Roma Tuidam husat i bin dairektim olgeta skul namel long taun eria bikos long COVID-19 keis i kamap long Alotau taun.

Long pasim klas insait long Alotau taun ilektoret em bihainim oda bilong Provinsel Stet ov Emejensi Kontrola Dairektiv long saspendim skul.

Dispela dairektiv i kam bihain tasol long 172 Gret 12 Cameron Sekenderi Skul sumatin i bin sindaun long Writen Ekspresen Eksem wantaim moa long 32, 000 Gret 12 long olgeta hap bilong kantri.

“Mipela i gat 192 gret 12 sumatin long stat bilong dispela yia tasol 172 sumatin i bin sindaun long eksem bihain long 20 sumatin i kisim witdro long skul,” Deputi Prinsipel bilong Ekademik Shirley Apayo i tok.

“Mipela i gat bilip olsem ol bai mekim gut bikos ol i bin wok hat bihain long lokdaun. Inglis dipatmen bilong skul i bin wok hat long helpim ol na redim ol sumatin long dispela eksem. Ol i bin kisim risos hanbuk bilong ol long las wik Mande olsem na ol i bin gat wanpela wik long redim ol long eksem.”

Em i tok moa olsem ol sumatin i bin bihainim strongpela COVID-19 Protokol long tai mol i statim eksem. Ol putim tebol bilong sindaun longwe long narapela, wasim han, werim mask pastaim na go insait long eksem rum.