DISPELA COVID-19 lokdaun i givim hevi long olgeta sumatin husat i bin kisim sot kos skul long Limana Vokesenel Skul long Pot Mosbi.

Deputi Prinsipal bilong Limana skul Mis Ivy Labradores i tok planti sumatin i bin widro long skul na sampela ol i no kisim widro kad tasol ol i no kam long skul tu, em ol i kaunim namba bilong de ol i no kam na bai ol singautim ol kam kisim fomal widro kad.

“Mipela i gat bikpela hevi long putim ol sot kos sumatin bilong mipela long ol bisnis na kampani wok bikos olgeta haus i pas,” Mis Ivy Labradores i tok.

Em i tok sampela ol oganaisesen i kisim ol sumatin long wok bihain long namba tu lokdaun.

“Bikpela samting i no gat wanpela bilong mipela i kisim coronavirus sik, olsem na skul bai ran wankain, tasol mipela serim ol sumatin long sindaun 34 insait long wan wan klas bilong ol,” em i tok.

 “Maski hevi bilong Limana skul i stap tasol skul bai ran wankain long neks yia na ol arapela yia,” em i tok.

“Mipela i gat bikpela bilip olsem olgeta sot kos sumatin bai painim hap bilong wok na winim hevi bilong COVID-19 pandemik.”

Jacklyn Kimala i raitim