Katolik Helt Sevis long kantri nau i kisim ol Pesenel Protektiv Ikwipmen (PPE) long Caritas Australia na Catholic Health Service Secreteriat (CHSS).

Dispela i kamap aninit long COVID-19 rispon plen bilong Katolik Sios we Sios Patnasip Program (CPP) i fandim long en.

CHSS i lukautim bikpela hap bilong helt fesiliti long kantri. Ol i save lukautim olsem 233 helt fesiliti long distrik haus sik i go inap long etpos long Papua Niugini.

Long rispon long COVID-19  Katolik sios i baim K500,000.00 PPE long givim i go long ol helt fesiliti bilong ol long helpim ol redi long daunim sik COVID-19.

Program Menesa bilong CHSS, Graham Apian, i tok dispela ol saplai bai helpim ol helt woka i stap long olgeta hap bilong kantri.

“Katolik helt sevis bilong mipela i lukautim 250 helt woka husat i stap paslain long daunim COVID-19. Planti i wok long sevim ol komyuniti aninit long hatpela envairomen na ol i bai amamas tru long kisim ol dispela PPE long helpim ol long wok bilong ol,” em i tok.

Caritas Australia Program Kwaliti na Ifektivnes Menesa, Roslyn Kuniata i tok ol helt sevis em i bikpela samting long dispela kain hevi long wol.

“Taim ol namba bilong COVID-19 keis long kantri i sut i go antap tru na ol lokdaun i kamap klostu klostu, dispela i mekim ol wokmanmeri bilong mipela long kwiktaim mas salim ol PPE i go long ol helt woka bilong mipela long banisim ol yet long COVID-19,” em i tok.    

Disasta Menesmen Kodineta bilong Caritas Australia, Charlotte Vada i tok COVID-19 plen bai i go het yet inap Disemba bikos ol namba long kantri i go antap yet.

“ Rispon plen bilong mipela i bai go het yet inap mun Disemba na long dispela taim bai mipela i trenim ol Het Tisa long ol provins na givim ol matirel long ol katolik skul bilong mipela we i makim wan kota bilong ol skul long PNG,” em i tok.

Catholic Bishop Conference, Caritas PNG na Caritas Australia i kamapim dispela COVID-19 join rispon plen. Dispela plen i bin kamap long mun Epril 2020.