MADANG Provinsal Helt Atoriti (MPHA) i op bihain long namba wan miting bilong ol bod
memba long Karkar Haus sik i no long taim i go pinis.

Ol opisa bilong Madang PHA i go long Karkar Ailan long sip Kalibobo Spirit long opim nupela
PHA bilong Madang. Sif Ekseketiv Opisa Dokta Kalara na Edministreta Yang Letag bilong
Tschark Memorial haus sik i lukautim.
Ol ekseketiv opisa bilong MPHA na ol wokmanmeri bilong Modilon Provinsal Haus sik olsem,
Dokta Martin Daimen, Dokta Sammy Thomas, bipo minista bilong helt Sir Peter Barter na ol
arapela i bihainim ol bod memba bilong MHPA long dispela raun.
Sir Peter i tok em i bin givim PHA Helt Ekt long Palamen taim em bin i stap olsem Minista
bilong Helt long dispela taim na em i gat bikpela tingting long Madang Provinsal Gavman
long i go pas long mekim wok i kamap. Tasol dispela i no bin kamap. Em i tok planti krismas i
kam i go pinis na nau Madang i kamapim wok long dispela ekt na opim MPHA.
Em i tok amamas long ol nupela bod memba bilong MPHA na em i tok em i redi long wok
wantaim atoriti, ol dokta na ol helt wokmanmeri long strongim na karim aut ol helt sevis
long Madang provins.
Nesenel Palamen i tok orait long PHA Ekt long daunim pasin bilong mekim gen ol wankain
samting, na bringim ol profesenel medikol prektisina na edministreta i kam aninit lon
wanpela hap we ol i ken skelim ol risos na save bilong ol namel long ol yet. Bikpela tingting
em long apim mak bilong helt sevis bilong ol pipel insait long dispela wokbung.
Em pinis
Kepsen: Fidelis Waipma CEO bilong MPHA, na ol memba bilong MPHA i kisim blessing long
ol pasto long taim bilong opim MPHA long Gaubin, Karkar.