TWENTI-SEVEN tausen manmeri long Mosbi Saut Ilektoret na Nesenel Kepital Distrik bai
kisim taim long ol helt sevis sapos Salvation Army Koki Klinik long Mosbi Saut i pas tumora.

Ekting Dairekta bilong ol Helt Sevis long Salvation Army Papua Niugini na Solomon Islands
Teritori, Charlie Clement i tok Nesenel Dipatmen bilong Helt (NDOH) na NCD Provinsal Helt
Atoriti i no givim mani long ranim dispela haus sik olsem na bai ol i pasim.
“Mipela i nogat mani long ranim dispela klinik. Mipela i sainim wanpela MOA wantaim
Nesenel Dipatmen bilong Helt long 2018 long ol bai helpim mipela wantaim fanding long
olgeta mun tasol long dispela taim i kam inap nau ol i bin givim K200, 000.00 tasol long
Oktoba 2019. Mipela i yusim dispela mani insait long 6-pela mun na em i pinis long mun Mas
2020.
“Long dispela taim i kam inap nau mi wok long askim NDOH na NCDC long helpim mipela
tasol ol i no bekim ol askim bilong mi. Las tupela fotnait i go pinis mipela i painim mani na
baim ol helt woka na nau mipela i kisim taim tru. Ol dispela helt woka i gat famili long
lukautim, sapos ol i no kisim pe na i go i kam nating long wok i stap em i no gutpela, olsem
na mipela i mas pasim klinik,” Mista Clement i tok.
Propeti Menesa bilong Salvation Army PNG na Solomon Islands Teritori, Meja Bugave Kada i
tok ol i les na sori tru long pasim dispela klinik tasol i no gat we.
“Salvation Army PNG na Solomon Islands Teritori i les tru long toksave long ol pablik na ol
pipel bilong Mosbi Saut na NCD olsem haus sik bai pas long 21 Ogas, 2020. Moto o bikpela
tingting bilong Salvation Army em long “Givim bel i go long God na han i go long ol pipel” na
sapos dispela klinik i pas em bai katim han bilong mipela long helpim ol pipel long ol
setelmen i stap long Mosbi Saut olsem, Talai, Gorobe, 2 Mail, Muniogo, Wanigela, Vanagi na
ol arapela,” Mesa Kada i tok.
Anna Clement, Helt Menesa bilong Mosbi Saut long Salvation Army i tok dispela haus sik i
save helpim klostu 27, 000 manmeri long wanpela yia na i gat sikispela helt woka i wok
insait long dispela klinik. Klinik i bin op long Mas 2013 na long dispela taim i kam inap nau
Salvation Army i save painim mani na sapotim dispela klinik.
Olgeta helt sevis ol i save givim em i fri.
Salvation Army i singaut i go long Nesenel Dipatmen bilong Helt na NCD Gavana long lukluk
na helpim Salvation Army Koki klinik long em i mas op stap yet na helpim pipel bilong NCD
na PNG.

Rebecca Negere i raitim