Planti samting i mas kamap long strongim na helpim ol meri na ol lain husat i kisim hevi bikos ol i sutim tok nating long ol olsem ol i sanguma na paitim na bagarapim ol.

Famili na Seksuel Vailens Opisa, Saiden Jimmy Suaip long Sauten Hailens i tok, “Planti samting i mas kamap long strongim ol meri long kam na ripot taim ol i sutim tok long ol. Planti ol meri i hangamap, pilim pen na i dai  insait long ol bus ples long provins tasol ol famili bilong ol i no save ripotim mipela bikos ol i save pret long pasin bilong bekim.”

Em i mekim dispela tok long taim ol Katolik komyuniti long Daiosis bilong Mendi na ol memba bilong ol arapela sios i bung wantaim na luksave long namba wan intenesenel de egens Soseri ekyusesen edvokesi na awenes long 10 Ogas 2020.

Vika Jeneral bilong Daiosis bilong Mendi, Pater Pius Hal i tok, maski ol i ripot long ol liklik keis bilong Sorcery Related Accusation Violence (SARV), trupela tok em olsem planti ol meri insait long Sauten Hailans Provins i bungim dispela hevi na sampela bilong ol em ol i tokim ol long lusim famili na ples bilong ol.

 “Long planti hap long Sauten Hailans, planti save tingim olsem dai i no save kamap nating, olgeta dai i kamap i mas i gat as, olsem wanem na dispela man i dai? Olsem na taim dispela i kamap ol i save sutim tok long ol lain i no gat samting na ol lain i no gat strong,” em i tok.

Em i tok nogat long pasin bilong baim ol glasman long taim bilong hevi na long taim man i dai. Em i singaut long ol komyuniti long lukim ol dokta long haus sik na kisim ripot bilong man i dai long wanem rot.

“Ol glasman i no nidim evidens long tokaut long as bilong dai, ol i save sutim tok nating long ol lapun na ol meri na dispela em pasin bilong satan. Ol dokta skul long marasina ol i ken givim evidens long olsem wanem man i dai,” em i tok.

Moa long 3000 manmeri na pikinini i mekim dispela bel isi na awenes wokabaut. Ol i mas na singaut olsem, “No ken kilim ol mama, papa na ol yangpela meri. Rispekim ol mama na susa bilong yumi.”

Long dispela de, ol i lukluk na tingim ol lain i kisim bagarap long SARV na ol i mekim awenes long daunim dispela pasin nogut insait long komyuniti.

Rebecca Negere i raitim