WANPELA senia pablik sevan bilong gavman long Isten Hailans Provins i bin tingim tupela bikpela
praimeri skul em Oliguti na Hairo praimeri skul long Lufa distrik na em i givim ol kompiuta set long las wik
Tunde.

Long taim bilong presentesen bilong ol kopiuta set we i kos moa long K10, 000, Ben Ulopo dairekta bilong
Kopret Sevis i tok opis bilong em wantaim ol mensesmen tim bilong EHPA i wanbel long wok wantaim
long bringim sevis i go daun long ol pipel insait long 8-pela distrik long provins.
“Na dispela em i wanpela bilong ol sevis we mipela i sindaun wantaim, toktok na wanbel long baim dispela
ol kompiuta na givim long dispela tupela skul. Mipela i mekim olsem, long wanem, mipela i luksave olsem
ol tisa na sumatin tu i nidim dispela samting long helpim ol. Mipela i wanbel long pusim wok bilong groim
kepesiti we mipela i tingting long statim wantaim ol skul na bihain go insait long ol arapela samting na ol
projek olsem infrastaksa divelopmen. Na Lufa em i wanpela bilong dispela ol distrik”, Ulopo i tok.
Em i tok helpim na sapot em bai stap long edukesen, helt na ol arapela infrastraksa divelomen we ol pipel
bilong Lufa distrik bai ken kisim sevis long en.
Het tisa bilong Uliguti praimeri skul Tobias Youbau i tok amamas EHPA luksave na givim dispela ol masin
long helpim skul.
Het tisa bilong Hairo praimeri skul Pokere Mark i mekim wankain tok olsem. Em i tok dispela skul we em i
stap olsem hetmasta inap moa long sikispela yia i no i bin kisim wanpela kain helpim olsem i kam long opis
bilong provinsal gavman na opis bilong lokal memba bilong distrik tu.
“Dispela em i namba wan taim long wanpela sinia pablik sevan i luksave long dispela hevi bilong helpim
dispela skul. Ol tisa wantaim ol sumatin long dispela skul i nidim kompiuta masin na ol arapela samting moa
long mekim ol wok bilong skul.Tasol husat tru bai kamap na helpim mipela wantaim dispela ol samting?
“Tenkyu tru Mista Ulopo. Maski sapos dispela em i no bikpela na planti ol samting em opis bilong yu i
givim long helpim mipela, tru tumas, em bai i ken kamapim bikpela senis tru long pusim ol wok bilong
dispela skul i go moa yet”, Mark i tok.
Ends…
Potokepsen/Ulopogivimkompyutamasin…
Poto # 1 – Isten Hailans Provins na ol Edministresen Kopret Sevis Dairekta Ben Ulopo (namba 2 long lep) i
bin givim ol kompiuta i go long ol hetmasta na menesmen bilong Hairo Praimeri skul long Lufa distrik, las
wik Tunde.
Poto # 2 – Elementeri skul pikinini meri bilong Hairo praimeri skul long Lufa distrik Iavo Lawrence i bilas
tumbuna na kisim Sinia pablik sevan Ben Ulopo (namba tu long rait) wantaim hetmasta Pokere Mark na
skul bod siaman Don Peter long taim bilong presentesen. (Olpoto: Sape Metta)

Sape Metta i raitim