Ol Helt woka na ol famili bilong ol long Tsigmil EBC Helt senta long Minj, Jiwaka Provins i kisim kaikai long han bilong ol wan wan manmeri long komyuniti long stap laip.

Dispela i kamap bikos ol dispela sikispela helt woka wok long dispela helt senta i no bin kisim pe bilong ol na i no gat moa mani long ranim dispela helt senta.

Dispela samting i kamap na i mekim dispela helt senta long daunim sampela helt sevis bilong en.

Ol helt woka i wok long lukluk tasol long ol imejensi keis na i dairektim ol arapela keis i go long ol bikpela haus sik.

Opisa husat i lukautim Tsigmil EBC helt senta, Joe Wates i tok, sapos ol dispela gutpela manmeri long Kumge traib bilong wod 18 na ol arapela ples long Tsigmil 2 i no mekim gutpela pasin long ol, ol i nap long lusim na i go pinis.

“Mi na ol faivpela wanwok bilong mi na ol famili bilong mipela i amamas tru long sapot i kam long komyuniti. Dispela i soim stret bikpela tingting bilong ol komyuniti olsem ol i nidim helt sevis. Mipela i no inap mekim wanpela samting, mipela i wet long gavman tasol,” Mista Wates i tok.

Ol manmeri long komyuniti i wok long sapotim dispela helt senta wantaim kaikai long stat bilong mun Julai yet na ol i wet tasol long sampela gutpela nius long Gavman.

“Mipela i sori tru long ol sikispela wokmanmeri bilong mipela bikos ol i no kisim pe na ol i bungim planti hevi. Dispela em wanpela hevi i kamap we mipela i no inap long stretim. Dispela kantri i bungim hevi bilong COVID-19 na mipela i save olsem gavman i kisim taim tasol laip bilong ol manmeri long hia i stap long mak nogut sapos ol bai i no inap long kisim tritmen long helt bilong ol. Mipela i singaut long Praim Minista James Marape na NEC long lukluk long hevi  bilong sios helt sevis tu,” Komyuniti lida Blacky Mond i tok.

Mista Mondi tok moa olsem, long 28 helt fesiliti i stap long Jiwaka, sios helt sevis i ranim 22 na EBC i ranim 10. 

Hoffman Gulgarye i raitim