Em i bikpela samting long ol medikol sumatin long pinisim skul, Praim Minista James Marape i tok.

Ol medikol sumatin husat bai greduet long pinis bilong dispela yia bai go insait na helpim ol liklik namba bilong ol helt woka long kantri, olsem na em i bikpela samting long ol skul i mas op na olgeta sumatin i mas i go bek gen long skul.

Praim Minista James Marape i mekim dispela tok long Tunde moning long dispela wik taim em i laik givim apdet bilong COVID-19 awenes.

“Ol medikol sumatin husat bai greduet long pinis bilong dispela yia bai wok olsem dokta o helt kea giva long sapotim na wokbung wantaim ol liklik namba bilong ol helt woka long kantri,” Marape i tok.

Em i tok, olgeta sumatin long elementeri, praimeri, haiskul na long kolis na yunivesiti i bai go bek long skul long neks wik Mande na em i apim lokdaun long Nesenel Kepital Distrik long asde Trinde, 12 Ogas.

Em i singaut long olgeta edministresen bilong ol skul long elementeri i go inap long yunivesiti long stretim gen olsem wanem ol sumatin bai i go i kam long skul na abrusim COVID-19.

Em i tok sik COVID-19 i stap pinis long kantri olsem ol arapela sik olsem na kantri i mas lainim long stap wantaim dispela sik inap ol i painim marasin bilong en.

“Mi kisim tingting bilong Nesenel COVID-19 Health and Research Advisory Committee long mipela i mas lainim long slip kirap wantaim COVID-19 na no ken mekim ol hatpela lo long daunim COVID-19 inap ol saintis i painim marasin bilong en,” Mista Marape i tok.

Rebecca Negere i raitim