OL Gret 12 sumatin bilong olgeta hap bilong kantri i redi long kisim Risos Buk tude long redim ol long Riten Ekspresen Eksem bilong ol long neks wik Mande, 17 Ogas 2020.

Seketri bilong Edukesen Dokta Uke Kombra i tok dispela yia em i gat 32, 841 gret 12 sumatin bilong 188 Sekenderi Skul wantaim praivet na 6-pela Nesenel Hai Skul insait long kantri ol i bin makim long sindaun long Ekeminesen.

“Mi laik tokaut olsem dispela Dipatmen wantaim ol Measurement Sevis Divisen i redi long givim ekseminesen pepa long ol skul long olgeta provins insait long kantri,” Dokta Kombra i tok.

“Olgeta Gret 12 sumatin i kisim Riten Ekspresesen Risos Hanbuk bilong ol long  8 klok moning long dispela wik Mande 10 Ogas, 2020 long ritim na redi long trupela Riten Ekspresen Ekseminesen we ol i bin surukim go long neks wik Mande 17 Ogas, 2020.”

Ol Skul long Nesenel Kapital Distrik (NCD) i bin pas tupela wik nau bikos long Pendamik Ekt 2020 Oda bihainim namba bilong planti COVID-19 keis.

Dipatmen bilong Edukesen i toksave long olgeta sumatin bilong NCD long werim mask taim ol i go long skul long kisim risos hanbuk bilong ol.

Ol sumatin i mas redim ol yet insait long wanpela wik long sindaun long Riten Ekspresen Eksem.

Olgeta Provinsel Edukesen Edvaisa (PEA), Provinsel Ekseminesen Supavaisa, Sinia Sekenderi Inspekta, Gaidens Opisa, Prinsipel na Gavening Kaunsil i mas lukautim sekyuriti bilong Ekseminesen pepa na wantaim edministresen bihainim rul bilong Measurement Service Division.

Olgeta i mas save olsem penalti bilong lukim wok na raitim ansa helpim long ansa i tambu tru long nesenel ekseminesen bikos em bai nogat setifiket. Olsem na olgeta sitisen i mas sapotim balens ekseminesen long olgeta sumatin we nau i stap long nesenel laik bilong yumi.

“Mi laik tok gud lak long olgeta gret 12 sumatin long olgeta hap bilong kantri long Riten Ekspresen Ekseminesen bilong ol,” Dokta Kombra i tok.