MEMBA bilong Wapenemanda Distrik bilong Enga provins  Rimbink Pato i bin baim K3 milien bilong olgeta elementri, kolis na yunivesiti sumatin bilong Wapenemanda insait long ilektoret bilong em.

Ol i bin tokaut long dispela long UPNG wantaim moa long 300 Wapenemanda sumatin long taim em i bin givim sek bihainim namba bilong ol sumatin husat i skul insait long 18 skul bilong Nesenel Kapital Distrik.

Mista Pato i tok maski kantri bilong yumi i bungim hevi long mani; em i kisim taim long sapotim ol papamama i stap bek long ples na baim skul fi bilong ol pikinini.”

“Dispela skul fi em i no rait na sans bilong yupela ol sumatin tasol mi yet kam long baim bikos mi bin mekim promisim long stat bilong yia,” Pato i tok.

Long olgeta institusen, ol UPNG sumatin i bin kisim sek wantaim bikpela skul fi mani mak K428.000 long wan wan 214 sumatin.

Presiden bilong UPNG Wapenemanda sumatin asosiasen Boss Kaki i bin makim maus bilong olgeta UPNG sumatin na tok bikpela tenkyu long memba long dispela bikpela han mak bilong em.

“Mi makim maus bilong olgeta sumatin bilong UPNG, Pot Mosbi Bisnis kolis, Pasifik Advantage University na olgeta ol arapela 18 institut na i laik kisim dispela taim long tok tenkyu long memba bilong mipela long sapotim mipela long dispela taim no gut,” Mista Kaki i tok.