GORDON Sekenderi skul i bin pasim skul bikos long COVID-19 Pendamik lokdaun stat long las wik insait long Nesenel Kapital Distrik.

Wantok Niuspepa i bin raun go lukim skul na toktok wantaim Prinsipal bilong Gordon Sekenderi Mista George Wek Kenega long las wik Fraide.

“Mipela i no wanbel long dispela namba tu taim lokdaun bilong coronavirus sik tasol bai mipela mekim wanem olsem na mipela bihainim tasol toktok bilong gavman long pasim skul long14 de,” Prinsipel George Wek Kenege i tok.

Em i tok dispela 14 de lokdaun i pasim rot bilong asesmen na redim ol gret 10 na 12 long Written Ekpresen na Nesenel Eksem bilong ol.

“Insait long dispela 14 de lokdaun em mi larem ol sumatin go stap long haus na mi bin askim olgeta tisa long kam na redim ol skul bilong ol sumatin na wetim gavman bai tok wanem bihain long 14 de lokdaun,” Kenege i tok.

“Sapos gavman i tok orait long statim skul bihain long 14 de lokdaun, mi tingting long askim bos bilong mi long kisim klas long moning, na apinun wantaim, kain olsem ol gret 10, 12 bai kam long moning na olgeta wiken na ol gret 9 na 11 bai kisim klas lo apinun long karamapim ol taim mipela i bin lusim long lokdaun,” em i tok.

Em i tok dispela wik ol sapos long mekim mok eksem na redim ol yet long nesenel eksem tasol COVID-19 lokdaun i pasim.

“Mipela olgeta tisa i wanbel long stap na redim ol asesmen wok bilong ol gret 10, 12 na taim ol i kam bek long COVID-19 lokdaun bai ol i ken redim ol long eksem tasol, na tu wankain long ol gret 9 na 11,” em i tok.

Jacklyn Kimala i raitim