Jiwaka Provinsel Edukesen Divisen i bin donetim 23-pela bokis bilong ol risos teks buks i go long wanpela rimot skul long Fonde (Julai 9).

Provinsel edukesen bod (PEB) deputi siaman Paul Pap, PEB Katolik representetiv Anna Kombuk, na Karikulum na Prokuemen Kodineta Carolyn Ape i bin givim ol buks i go long Kurkur Sacred Heart Praimeri Skul insait long Anglimp lokol level gavman.

Ol i bin givim tupela katen teks buks long gret 3 na narapela tupela katen long gret 4 klas.

Na ol gret 6 na gret 8, em wanwan gret i kisim 4-pela katen bilong Sosol Saien teks buks, na narapela 2-pela katen bilong Making a Living (MAL) teks buks bilong gret 6.

Skul i laki kisim 5-pela bokis bilong poket baibel we i stap long Gideons International veson.

Misos Ape i tok olsem ol dispela buks bai i helpim ol tisa long planim ol rait karikulum we bai i bihianim tru karikulum rifom we i wok long kamap insait long edukesen sistem bilong kantri.

Bod Siaman bilong skul John Wain, het tisa Michael Kiap na olgeta tisa i amamas long dispela donesen na i tok tenkyu long ol PEB opisal na Misis Ape long kisim gutpela tingting long helpim Kurkur Praimeri Skul.

Mista Pap i singaut long skul bod, ol tisa na ol saraundin traib bilong Kuli Konda, Kuli Relpi, Kuli Polgtpi, and Kuli Paldki olsem provinsel edukesen divisen wantaim provinsel gavman ananit long lidasip bilong Gavana Dokta William Tongamp i stap redi long sapotim ol skuls long givim kwaliti edukesen long bihain taim jeneresen.

Ol i bin givim ol buks long namba wan taim tru we skul i holim mid-yia asesmen wan greduesen we skul i bin givim ol ekademik ripot kat bilong Tem 1 na 2.

Misis Kombuk i apil long ol sumatin long ritim Tok Bilong God (Baibel) na putim God i go pas long laip bilong ol long kisim gutpela save na kamap gutpela sitisen bilong kantri bihian.

Man we i bin statim Kurkur Sacred Heart Praimeri Skul em leit Pata Robert Lak, foma Gavana bilong Westen Hailens long yia 1983.

HOFFMAN GULGARYE i Raitim