POT Mosbi Jeneral Haus sik (PMGH) i pasim sampela sevis bilong en long dispel wik Mande bihain long toksave bilong namba 17 positiv COVID-19 Keis i kamap long wiken.

Dispela 17 positiv keis em i wanpela meri husat i dai long sik kensa. PMGH Sif Ekseketiv Opisa Dokta Paki Molumi i tok, “Long bihainim lo bilong daunim COVID-19 we i kam long World Health Organisation mipela i save wokim test long ol bodi bilong ol manmeri. Olsem na mipela i luksave olsem dispela meri husat i bini gat sik kensa na dai, i bin gat COVID-19 tu. Long dispela as mipela i pasim ol arapela sevis bilong mipela long lukluk tasol long ol imejensi sevis.”

Em i tok PMGH i mekim dispela long lukautim ol wokman na ol sikman long haus sik. Ol i statim pinis klinap long kilim ol binatang bilong COVID-19 insait long haus sik. Ol i stat wantaim wod 2A we dispela namba 17 keis i bin stap bipo long em i dai.

 Dispela bikpela haus sik long kantri i pasim ol arapela sevis bilong en na bai ol i lukluk tasol long imejensi sevis, imejensi bilong ol piknini na wod bilong karim bebi.

PMGH CEO Dokta Molumi i tok PMGH i mekim dispela long lukautim ol wokman na ol sikman long haus sik.

“I gat ol protokol o rot i stap we mipela i mas bihainim. Namba wan wokmak bilong mipela em long lukautim ol wokman na ol sikman bilong mipela. Olsem na mipela i pasim sampela sevis bilong mipela na larim ol sampela wokman long mekim wokpainimaut na kontek tresing long ol arapela wokmanmeri husat i bung wantaim dispela 17 COVID-19 keis meri husat i bin dai long kensa long POMGEN,” Dokta Molumi i tok.

Long dispela taim,  kontek tresing i wok long kamap long ol wokman na ol famili bilong dispela meri. 

Rebecca Negere i raitim