Vais Presiden bilong Nesenel Dokta Asosiesen dokta James Naipo i tok dispela meri i dai long Pot Mosbi Jenerel Haus sik i no dai long COVID-19.

“Em i no dai long COVID-19. Em i dai long kensa,” Dokta Naipo i tok.

PNG i gat 27 keis nau. Namba 17 keis em i dai long haus sik, tasol em i no bin dai long COVID-19, em dai long sik kensa.

Dok Naipo i tok, “Ol arapela keis i bin positiv em ol i bin gat narapela sik i stap taim ol dokta i testim ol. No gat wanpela i bin dai. Na long lukluk bilong Dokta Naipo, i luk olsem planti pipel i bin kisim pinis dispela sik COVID-19 insait long PNG tasol ol i no kisim ol narapela sik.

“PNG i mas amamas olsem no gat indai i kamap long COVID-19. PNG i mas amamas olsem no gat planti pipel i kisim sik COVID-19.

“COVID-19 em i lainim mipela long nupela nomol. TB tu i  lainim mipela long ol rot bilong abrusim em. HIV tu i lainim mipela long ol we bilong abrusim em.

Wankain diabetes, Hypertension, Obesity tu i lainim yumi long ol rot bilong abrusim ol.

“Tasol kensa em no gat. Em i wok long kilim planti ol pipel bilong Papua Niugini. Olgeta Fraide mi wok long mekim ol sejeri bilong traim na sevim wanpela laip o sevim wanpela long no ken dai hariap. Olgeta Fraide em wankain, planti kensa sikman i wet long kisim helpim. Kensa em i wok long winim resis bilong kilim ol man, meri na pikinini insait long Papua Niugini.

“Yumi laki stret long banisim gut COVID-19 insait long PNG.  Yumi traim mekim wankain tu long kensa,” Dokta Naipo i tok.