Papua Niugini i konfemim 8-pela nupela keis bilong COVID-19 long Tunde dispel wik. Dispela em i bikpela namba long wanpela de na i bringim namba bilong COVID-19 keis long kantri i go antap long 27.

Dispela 8-pela keis em ol manmeri husat i save stap long Pot Mosbi, na dispela i soim olsem insait long 6-pela de tasol Pot Mosbi i ripotim 15-pela COVID-19 keis.

Dispela bikpela namba bilong COVID-19 keis i soim olsem COVID-19 i stap insait long ol komyuniti long Nesenel Kepital Distrik na i wok long kalap i go i kam long ol manmeri.

Praim Minista James Marape i toksave long ol pablik long putim pes mask o karamapim pes long ol pablik ples. Em i tok em bai mekim moa toksave long sait bilong helt bihain long em i bung wantaim ol COVID-19 Helt Edvaisori Komiti.

Insait long dispela 8-pela nupela keis, 4-pela bilong ol em ol sumatin. Tripela i hai skul sumatin na wanpela sumatin i bilong Yunivesiti ov Papua Niugini (UPNG). Dispela sumatin long Yunivesiti long Papua Niugini em i wanlain bilong wanpela wokman long Central Public Health Laboratory husat i bin kisim COVID-19.

Vais Sansela bilong UPNG, Profesa Frank Griffin i salim toksave i long olgeta sumatin bilong UPNG long kisim test kwiktaim sapos ol i bin pas wantaim dispela sumatin.

Rebecca Negere i raitim