GAVANA bilong Is Sepik Allan Bird i bin tokaut olsem olgeta Gavana bilong ol provins i redi long surukim wok bilong kwaliti edukesen insait long wan wan provins bilong ol.

“Long makim maus bilong olgeta gavana bilong provins, mi tok tenkyu long Praim Minista James Marape gavman na edukesen dipatmen long givim moa taim long edukesen bikos em laip bilong olgeta sitisen bilong kantri,” Gavana Bird i tok.

“Mipela i bin laikim planti nupela samting long dispela edukesen straksa olsem na mipela i redi long wok wantaim dispela dipatmen na ol pikinini bilong mipela,” em i tok.

“Dispela Nesenel Gavman i nid long kamapim gen nupela senis na mipela i nid long senisim edukesen bilong dispela kantri long bungim driman bilong kantri,” Bird i tok.

“Insait long dispela taim na krismas edukesen em laip bilong olgeta sitisen olsem na wantaim dispela nupela senis bilong edukesen ating mipela bai wokim em i kamap namba wan long kantri,” em i tok.

“Long mekim dispela senis i kamap, ating Praim Minista James Marape mipela i mas senisim dispela rilesensip namel long olgeta husat i save stap insait long dispela rot bilong edukesen long givim kwaliti sevis long ol sitisen,” em i tok.

“Mipela olgeta gavana bilong wan wan provins i sanap strong wantaim na redi long helpim yu na ol gavman long wok bung wantaim bilong olgeta sitisen bilong kantri bai olgeta i gat rait long kisim ful edukesen,” Bird i tok.

Jacklyn Kimala i raitim