PRAIM Minista James Marape i bin askim olgeta provinsal gavman na distrik olsem wanem kain rot bai ol i bihainim long daunim hevi bilong edukesen insait long kantri long wanpela bikpela bung bilong edukesen dipatmen long las wik.

“Nesenel Gavman i wanbel long wok bung wantaim ol provinsal gavman na Distrik long wok bilong edukesen bikos em bikpela namba wan samting bilong  olgeta sitisen insait long kantri,” Praim Minista bilong Papua Niugini James Marape i tok.

“Mi laik askim olgeta gavana bilong ol provins long sindaun bek na lukluk fowat long wanem kantri bilong yumi i mas mekim insait long 2020 bikos bai yumi amamasim 50 Golden Jubilee bilong dispela nesen,” Marape i tok.

“Mipela i mas redim kantri bilong mipela gut long go fowat na dispela bai kamap long kwaliti edukesen sistem na nupela infrastraksa divelopmen,” em i tok.

Marape i tok dispela ol stetistik i gat sampela wok olsem provinsal gavman, distrik na nesenel gavman i mas yusim bikos dispela i gutpela long kamapim kwaliti edukesen bilong sitisen.

Em i tok wanem wok bilong Nesenel Gavman na provinsal gavman i save givim sevis long ol provins

“Bikpela salens long olgeta Gavana i mas tingim senis bilong edukesen sistem na toktok long paplik sekta,” em i tok.

Em i tok olgeta tisa insait long kantri i mas gat gutpela kwalifikesen bilong wok tisa long elementri, praimeri na Hai skul.

“Mipela i luk fowat long sapotim dispela senis bilong edukesen na i laik lukim senis i kamap long dispela olsem na mipela i bai mekim bai olgeta provins i ken kisim gutpela sevis,” Marape i tok.

Marape i tok edukesen em bikpela samting bilong ol sitisen insait long kantri olsem na olgeta provinsal, distrik, nesenel gavman na edukesen dipatmen i mas wok bung wantaim long kamapim senis.

Jacklyn Kimala i raitim