WAIPU komyuniti long Enga provins i gat tupela elementri skul we i save bungim olgeta as ples pikinini wantaim tisa bilong ol.

Dispela elementri skul i bin stat long 2014 na nau em 6-pela yia na olgeta as ples pikinini i save skul bikos em haus doa.

Wanpela sinia tisa meri bilong Waipu elementri skul Misis Roselyn Makol i tok planti pikinini i save kam skul long olgeta de na lainim samting.

“Mipela no gat planti skul samting kain olsem blakbod, o sok bilong rait, sampela taim mipela i save skulim ol pikinini long maus tasol,” Makol i tok.

Em i tok kamap tisa bilong elementri skul em i no isi long wanem ol pikinini i no save gut long rit na rait sampela i save.

“Mipela i gat 3-pela tisa tasol i save skulim ol pikinini maski taim no gut o gutpela taim mipela save traim long givim kwaliti edukesen long ol liklik pikinini,” em i tok.

Em i tok Waipu komyuniti yet i save sapotim elementri skul sikispela yia nau, bikos ol i no laikim pikinini bilong ol long painim skul i go long narapela hap.

“Bikpela salens bilong mipela em Inglis, tokples Enga i no bai helpim ol bihain taim olsem na mipela traim long lainim sampela Inglis wantaim insait long klasrum,” em i tok.

“Mipela i laik askim tu Enga Provinsel Gavman long luksave long mipela na sapotim wantaim liklik skul samting bai mekim mipela amamas na tu long gutpela bilong ol pikinini bikos em ol futsa bilong kantri,” em i tok.

Waipu elementri skul em divelop isi stap wantaim sapot bilong komyuniti lida na pipel yet bikos ol laiki, pikinini bilong ol long pinisim elementri skul wantaim kwaliti edukesen na kalap long praimeri skul.

Jacklyn Kimala i raitim